LATIFALARNING BOSHQA OG‘ZAKI EPIK HAMDA KULGIGA ASOSLANUVCHI JANRLAR BILAN MUNOSABATI

Latifa. Xalq og’zaki ijodi hayotning hamma sharoitiga mos asarlardan tashkil topgani yuzasidan fikr bildirgan edik. Latifalar ana shu fikrimizning yana bir dalili bo’lib xizmat qiladi. O’zbeklar dunyodagi boshqa xalqlar kabi hazilni, taqlidni, kulgini yaxshi ko’radilar. Kulgi insonga sog’lik, yaxshi kayfiyat, o’z-o’zidan qoniqish tuyg’usini bag’ishlaydi. Xalqimizning dono farzandlari Yusufjon qiziq, Aka buxor, G’anijon Toshmatov kabilar hayot mashaqqatli kechgan paytlarda ham yurtimiz ahliga tetiklik, umid, ishonch ulashganlar. Bunday natijaga erishish o’z vaqti uchun juda og’ir bo’lgan. Latifalar, loflar, askiya, xalq drammasi asarlari, muqallidchilikdan unumli foydalanish zukko va iqtidorli insonlarni xaqiqiy ma’noda xalq sevgisini qozonish sharafiga muyassar qildi.