RAQAMLI PLATFORMALAR MODELI VA ULARNING MIKROIQTISODIY SAMARADORLIGI

Maqolada raqamli platformalar modeli va ularning mikroiqtisodiy samaradorligi nazariy hamda amaliy jihatdan tahlil qilinadi. Raqamli iqtisodiyot sharoitida platformalar — iste’molchi va ishlab chiqaruvchini to‘g‘ridan-to‘g‘ri bog‘lovchi innovatsion iqtisodiy muhit sifatida qaralib, ularning bozor tuzilmasi, tarmoq effektlari, tranzaksiya xarajatlarini kamaytirishdagi roli va resurslar taqsimotiga ta’siri yoritiladi. Platformalarning ikki tomonlama bozor modeli asosida narx belgilash strategiyalari, raqobat muhiti va foydalanuvchi oqimining iqtisodiy samaradorlikka ta’siri tahlil qilinadi. Shuningdek, O‘zbekiston sharoitida elektron savdo, transport-logistika, onlayn xizmatlar platformalari misolida raqamli platformalarning firmalar va uy xo‘jaliklari uchun yaratayotgan qo‘shimcha qiymati, bozor samaradorligi, xarajatlarni optimallashtirish imkoniyatlari hamda innovatsion rivojlanishdagi o‘rni ko‘rib chiqiladi. Tadqiqot natijalari raqamli platformalar mikroiqtisodiy barqarorlikni ta’minlash, resurslardan tejamkor foydalanish va raqobatni kuchaytirishda muhim omil ekanini ko‘rsatadi.