O‘ZBEKISTONDA MOLIYA BOZORLARINING IQTISODIY O‘SISHGA TA’SIRINI BAHOLASH

Mazkur maqola O‘zbekistonda moliya bozorlarining iqtisodiy o‘sishga ta’sir mexanizmlarini o‘rganishga bag‘ishlangan bo‘lib, unda moliya bozorlarining iqtisodiy tizimdagi o‘rni, funksiyalari hamda ularning iqtisodiy o‘sish bilan o‘zaro bog‘liqligi nazariy va amaliy jihatdan tahlil qilingan. Tadqiqotda moliya bozorlarining iqtisodiy rivojlanishdagi asosiy roli sifatida jamg‘armalarni investitsiyalarga transformatsiya qilish, kapitalni samarali taqsimlash, moliyaviy resurslardan foydalanish samaradorligini oshirish va iqtisodiy risklarni boshqarish mexanizmlari asoslab berilgan. O‘zbekiston Respublikasida moliya bozorlarining hozirgi holati va rivojlanish tendensiyalari statistik ma’lumotlar asosida tahlil qilingan. YAIM o‘sish dinamikasi, investitsiya oqimlari, fond bozori faolligi hamda kapital bozorining iqtisodiyotdagi ulushi o‘rganilib, ularning iqtisodiy o‘sish jarayoniga ta’siri baholangan. Tahlillar shuni ko‘rsatadiki, mamlakatda iqtisodiy o‘sish barqaror bo‘lsa-da, moliya bozorlarining iqtisodiyotdagi ishtiroki hali yetarli darajada shakllanmagan.
Shuningdek, tadqiqotda O‘zbekistonda moliya bozorlarini rivojlantirishga qaratilgan Prezident farmon va qarorlarining mazmuni tahlil qilinib, kapital bozorini rivojlantirish strategiyasi, davlat korxonalarini xususiylashtirish jarayonlari hamda moliyaviy infratuzilmani modernizatsiya qilish bo‘yicha amalga oshirilayotgan islohotlar yoritilgan.
Tadqiqot natijalariga ko‘ra, moliya bozorlarining iqtisodiy o‘sishga ta’sirini kuchaytirish uchun fond bozorini rivojlantirish, moliyaviy instrumentlar turlarini kengaytirish, investorlar bazasini kengaytirish, aholi moliyaviy savodxonligini oshirish hamda xorijiy investitsiyalarni jalb qilish mexanizmlarini takomillashtirish zarurligi asoslab berilgan. Mazkur ilmiy ish natijalari O‘zbekiston iqtisodiyotida moliya bozorlarining rolini chuqur tahlil qilish va ularni rivojlantirish bo‘yicha ilmiy-amaliy tavsiyalar ishlab chiqishda foydalanilishi mumkin.