KICHIK VA O‘RTA GIDROELEKTROSTANSIYALARNING (GES) ENERGIYA TARMOG‘IDAGI AHAMIYATI

Ushbu maqolada kichik va o‘rta gidroelektrostansiyalarning (GES) energetika tizimidagi ahamiyati ilmiy asosda tahlil qilingan. Dunyo miqyosida qayta tiklanuvchi energiya manbalari ulushini oshirish hamda barqaror rivojlanish maqsadlarini amalga oshirishda kichik va o‘rta GESlar muhim o‘rin tutadi. Tadqiqotda, bir tomondan, ularning ekologik xavfsizligi va iqtisodiy samaradorligi ko‘rib chiqilgan, ikkinchi tomondan, elektr energiyasi ta’minotida diversifikatsiya yaratish, elektr uzatish tarmoqlarida barqarorlikni ta’minlash va energetik xavfsizlikni mustahkamlashdagi roli yoritilgan. Maqola natijalariga ko‘ra, kichik va o‘rta GESlar elektr energiyasi ishlab chiqarish jarayonida resurslardan oqilona foydalanishni ta’minlab, mahalliy hududlarda ijtimoiy-iqtisodiy rivojlanish uchun muhim omil bo‘lib xizmat qilishi aniqlangan. Shuningdek, ular issiqxona gazlari chiqindilarini kamaytirish, mahalliy energiya manbalaridan samarali foydalanish va energetika mustaqilligini oshirishga sezilarli ta’sir ko‘rsatishi ilmiy dalillar bilan asoslangan.