БАЧАДОН МЕЗЕНХИМАЛ ХАВФЛИ ЎСМАЛАРИДА ИММУНОГИСТОКИМЁВИЙ ЎЗГАРИШЛАРНИНГ ҚИЁСИЙ ПАТОМОРФОЛОГИК ТАҲЛИЛИ

Бачадон мезенхимал хавфли ўсмалари – лейомиосаркома ва стромал саркомада VEGF, Ki-67 ҳамда Bcl-2 маркерлари экспрессиясини қиёсий баҳолаш орқали ушбу ўсмаларнинг ангиоген, пролифератив ва антиапоптотик потенциалини аниқлаш ҳамда патоморфологик агрессивлик билан боғлиқ хусусиятларни ёритиш мақсадида тадқиқотга 40 нафар бемор киритилди, шундан 20 нафарида бачадон лейомиосаркомаси, 20 нафарида бачадон стромал саркомаси аниқланган. ИГХ тадқиқот Bond Leica Australia иммуногистопроцессорида VEGF, Ki-67 ва Bcl-2 моноклонал антителалари ёрдамида бажарилди. Ki-67 экспрессияси <10%, 10–20% ва >20% гуруҳларга ажратилди; Bcl-2 учун паст, ўрта ва юқори позитив реакция баҳоланди; VEGF бўйича бир кўрув майдонида микротомир зичлиги қиёсланган.
Олинган натижаларда лейомиосаркомада Ki-67 бўйича ўрта пролифератив фаоллик 75%, юқори фаоллик 25% ни ташкил этди. Стромал саркомада эса юқори Ki-67 экспрессияси 65%, ўрта фаоллик 25%, паст фаоллик 10% ҳолатларда кузатилди. Bcl-2 бўйича лейомиосаркомада ўрта позитивлик 50%, юқори позитивлик 25% бўлса, стромал саркомада юқори позитивлик 45% га етди. VEGF бўйича лейомиосаркомада бир кўрув майдонида 10–15 та, стромал саркомада 20–30 та позитив томир аниқланди. Ушбу маълумотлар стромал саркомада ангиогенез ва пролиферациянинг кучлироқ эканини кўрсатди.
Стромал саркома лейомиосаркомага нисбатан юқорироқ биологик агрессивликка эга бўлиб, бу ҳолат юқори Ki-67 ва Bcl-2 экспрессияси ҳамда VEGF орқали аниқланган кучли ангиогенез билан намоён бўлди. ИГХ маркерлардан фойдаланиш патоморфологик диагностика, прогнозни баҳолаш ва даволаш тактикасини танлашда муҳим аҳамиятга эга