QANDLI DIABET BILAN OG‘RIGAN HOMILADOR AYOLLARDA AKUSHERLIK VA PERINATAL ASORATLARNI PROGNOZ VA PROFILAKTIKA QILISH.

Qandli diabet metabolik kasallik bo‘lib, surunkali giperglikemiya bilan tavsiflanadi. Homiladorlik davrida aniqlangan diabet ko‘pincha gestatsion shaklda namoyon bo‘ladi, ammo ayrim holatlarda ilgari aniqlanmagan 1- yoki 2-tip diabet sifatida ham uchrashi mumkin. Epidemiologik ma’lumotlarga ko‘ra, GQD homilador ayollarning 2–5% ida uchraydi va bu ko‘rsatkich yil sayin ortib bormoqda.
Tadqiqot davomida turli tipdagi qandli diabetga ega homilador ayollarda akusherlik va perinatal asoratlar chastotasi, xavf omillari, lipid va uglevod almashinuvi buzilishlari, shuningdek komplement tizimi faolligining roli o‘rganiladi. Bundan tashqari, gipertenziya bilan kechuvchi homiladorliklarda perinatal natijalar tahlil qilinadi.
Tadqiqot ob’ekti sifatida qandli diabetning turli shakllariga ega bo‘lgan homilador ayollar tanlangan. Tadqiqotda klinik, laborator (glyukozaga tolerantlik testi, glikozillangan gemoglobin, koagulogramma), instrumental (UZI, dopplerometriya, kolposkopiya) va molekulyar-genetik (PZR) usullar qo‘llaniladi. Olingan natijalar statistik tahlil qilinadi.
Tadqiqot natijasida homiladorlikni olib borishning optimal algoritmini ishlab chiqish, erta diagnostika va samarali profilaktika choralarini takomillashtirish kutilmoqda. Ushbu natijalar ona va homila uchun asoratlarni kamaytirish hamda sog‘lom bola tug‘ilish ehtimolini oshirishga xizmat qiladi.