Patissonni iste’mol qilish usullari

Patisson (Cucurbita pepo var.), kulcha qovoq – qovoqdoshlar oilasiga mansub, bir yillik o‘simlik. Palagi tik, butasimon sershox o‘simlik. Ildizi yaxshi rivojlangan. Poyasi va barg bandlari nisbatan yo‘g‘on. Barglari o‘rtacha kattalikda, dag‘al, 3 yoki 5 qirrali. Gullari bir uyli, bir jinsli, yirik, rangi sariq, poyalarda yakka-yakka joylashadi. Mevasi –qovoqcha, mayda, shakli yulduzsimon. Chetlari kungurali. Yangi tukkan mevalari rangi och yashil, meva katta bo‘lgan sari rangi oqarib, ayrim mevalar yuzasida och yashil dog‘lar yoki tasmalar paydo bo‘lishi mumkin. Ularning 2-4 kunlik mevasi iste’mol qilinadi. Patisson issiqsevar o‘simlik. Patisson plyonka ostida fevral oyining birinchi 10 kunligida, ochiq dalaga esa aprelning birinchi 10 kunligida ekiladi. Qator va tup oralig‘i 70x70 yoki 80x 80 sm sxemada ekiladi.