THE RIGHT TO JUSTICE IN MODERN INTERNATIONAL LAW AND MECHANISMS FOR IMPLEMENTING THIS RIGHT

Odilsudlovga bo‘lgan huquq zamonaviy xalqaro huquq tizimida insonning ajralmas va asosiy huquklaridan biri sifatida e’tirof etiladi. Mazkur huquq sud jarayonida shaxsning huquqiy manfaatlarini himoya qilishi, uni noqonuniy cheklovlardan asrash, shuningdek, sud faoliyatining adolatli, mustaqil va xolis tarzda olib borilishini ta’minlashga qaratilgan universal tamoyillar majmuasini o‘z ichiga oladi. Inson huquqlariga oid xalqaro normalarda odilsudlovga bo‘lgan huquqning fundamental ahamiyati bevosita ta’kidlanadi. Xususan, Inson huquqlari umumjahon deklaratsiyasining (1948) 10-moddasida har bir shaxs o‘zining huquq va majburiyatlari belgilanishida, unga qo‘yilgan ayblovlar hal etilishida mustaqil va xolis sud tomonidan ochiq, adolatli va teng sharoitlarda ko‘rib chiqilish huquqiga egaligi alohida qayd etilgan. Shuningdek, Fuqarolik va siyosiy huquqlar to‘g‘risidagi xalqaro paktning (1966) 14-moddasi odilsudlovga oid xalqaro standartlarning yanada batafsil va majburiy normativ asoslarini belgilab, a’zo davlatlar zimmasiga keng qamrovli majburiyatlar yuklaydi.