O‘ZBEKISTONDAGI MADANIY MEROS OBYEKTLARINI 3D MODELLASHTIRISH ORQALI ARXITEKTURA VA TA’LIMNI RIVOJLANTIRISH

Ushbu ilmiy maqolada O‘zbekiston hududida joylashgan madaniy meros obyektlarini 3D modellashtirish texnologiyalari asosida raqamlashtirish va ularni arxitektura hamda tarix ta’limida samarali qo‘llash imkoniyatlari texnik yondashuvda tadqiq etilgan. An’anaviy o‘quv-uslubiy vositalar (2D suratlar, chizmalar, matnli tavsiflar) talabalarga murakkab tarixiy obidalarni to‘laqonli anglash imkonini bermasligi sababli, ushbu maqolada 3D skanerlash, fotogrammetriya, BIM modellashtirish va virtual reallik texnologiyalarining o‘quv jarayoniga integratsiyasi asoslab berilgan. Samarqand, Buxoro va Xiva shaharlaridagi tarixiy obidalar misolida mavjud raqamlashtirish loyihalari tahlil qilingan, zamonaviy texnologik usullarni amaliyotga joriy etishning metodologik bosqichlari ishlab chiqilgan. Tajriba-sinov darslari asosida talabalarning bilim darajasi oshganligi va o‘zlashtirish samaradorligi ortganligi aniqlangan. Shu bilan birga, texnik infratuzilma, pedagogik salohiyat va kontent yaratuvchilik bo‘yicha mavjud muammolar ham aniqlanib, ularni bartaraf etish bo‘yicha amaliy tavsiyalar berilgan. Maqolada ilgari surilgan yondashuvlar kelajakda O‘zbekiston ta’limida raqamli madaniy meros vositalaridan keng foydalanish uchun ilmiy asos yaratadi.